నాకు నిదురించాలని వుంది

చలిగాలి సుడులు తిరుగుతూ
ఆలపించే వణుకుల రాగం లో...

వెచ్చెచ్చని దుప్పటి కింద ముడుచుకున్న
అరమూతల కళ్ళ వెనుక కదిలే కలలో...
అమ్మవొడి చూసుకుని,
నాన్న గుండె తలుచుకుని,
మమతకి మారుపేరు నా మనసనుకుని...
ఆదమరవనీయని నా హృదయాన్ని

పలుమార్లు సేదదీర్చి, పలుకుగంధాలు వెదజల్లి
తనకంటి నీడ నా కంటి నలుపున కట్టిపెట్టి
నా చెంత నిలిచే నా తోడు కావలితో...

మంచుకురిసే రేయిలో, వానవీడని పొద్దులో
కాలమాగని గతిలో, కనికరంలేని ఋతువులో
కనపడని మాయ కమ్మిన బ్రతుకులో
నీకు నేను వున్నానన్న జతలయలో...

తృప్తిగా నాకు నిదురించాలని వుంది